HomeEntertainmentگھر میں ٹی وی تک نہیں تھا، بچپن میں کبھی پیسے نہیں...

گھر میں ٹی وی تک نہیں تھا، بچپن میں کبھی پیسے نہیں دیکھے، پنکج ترپاٹھی کا انکشاف

بھارت کے معروف اداکار پنکج ترپاٹھی نے کہا ہے کہ انہوں نے بچپن میں کبھی پیسے نہیں دیکھے اس لئے انہیں پرتعیش زندگی گزارنے کی چاہت نہیں ہے۔

بھارتی میڈیا رپورٹ کے مطابق بالی وُڈ کی نامور فلموں مرزاپور، گینگ آف وسیع پور، سنگھم اور دبنگ جیسی فلموں میں بہترین اداکاری کر کے لوگوں کے دلوں میں گھر کرنے والے بالی وُڈ اداکار پنکج ترپاٹھی نے انکشاف کیا ہے کہ انہوں نے بچپن میں کبھی کبھار ہی نقد پیسے دیکھے تھے اور ان کے گھر میں ٹی وی تک نہیں تھا۔

’ہندوستان ٹائمز‘ کے مطابق پنکج ترپاٹھی نے انٹرویو میں بتایا کہ انہیں پیسے کی اہمیت کا بخوبی اندازہ ہے اور ان کا خیال ہے کہ خوشحال زندگی گزارنے کے لیے ’فضول‘ یا ’اضافی‘ پیسے کی ضرورت نہیں ہوتی۔

یہی نہیں بلکہ حال ہی میں انہوں نے ایک انٹرویو میں کہا کہ فلم انڈسٹری کا مقبول چہرہ بن جانے کے باوجود انہیں لگتا ہے کہ وہ کبھی بھی بڑا گھر خرید نہیں سکیں گے اور نہ ہی کبھی وہ پرتعیش زندگی گزارنے کے اہل ہو سکیں گے۔

اداکار کا کہنا تھا کہ چوں کہ وہ انتہائی غریب گھرانے سے تعلق رکھتے ہیں، ان کے والد کسان تھے اور انہوں نے بچپن میں کبھی کبھی نقد پیسے دیکھے تھے، اس لیے انہیں پیسے کی اہمیت کا اندازہ ہے۔

انہوں نے بتایا کہ ان کے گھر میں ٹی وی تک نہ تھا اور وہ انتہائی سادہ زندگی گزارتے تھے۔

اداکار نے مزید کہا کہ وہ اور ان کی اہلیہ کئی سال سے ممبئی جیسے شہر میں رہ رہے ہیں مگر کبھی انہیں پرتعیش زندگی گزارنے کی ضرورت محسوس نہیں ہوئی اور نہ ہی انہیں ایسا لگتا ہے کہ اب وہ اچھی گاڑی خریدنے کے لیے قرض لیں گے۔

نیچرل اداکاری کی وجہ سے پنکج ترپاٹھی کو مقبولیت حاصل ہے—اسکرین شاٹ

پنکج ترپاٹھی کا کہنا تھا کہ انہوں نے ہمیشہ اس حال میں خوش زندگی گزاری، جو زندگی ان کے پاس تھی اور انہیں وقت، دولت اور زندگی کی اہمیت کا علم ہے۔

یاد رہے کہ پنکج ترپاٹھی نے 2004 میں بالی وُڈ فلم ’رن‘ میں مختصر کردار ادا کرکے کیریئر کا آغاز کیا تھا، جس کے بعد وہ 2006 میں ’اومکارا‘ میں بھی دکھائی دیئے تھے۔

کسان کا بیٹا ہوں، غربت دیکھی ہے، اداکار—اسکرین شاٹ

ابتدائی طور پر فلموں میں معاون اور مختصر کردار ادا کرنے کے بعد پنکج ترپاٹھی نے 2012 میں ’گینگ آف وسیع پور‘ میں اداکاری سے شہرت کی بلندیوں کا سفر طے کرنا شروع کیا۔

اداکار منفی کرداروں یا برے لوگوں کے اہم کارندے کے کرداروں کے لیے فلم سازوں کی پسندیدہ شخصیت بنے اور یوں پنکج ترپاٹھی کو ان چند بالی وڈ اداکاروں میں شمار کیا جانے لگا جن کی اداکاری کو نیچرل قرار دیا جاتا ہے۔

جبکہ مرزا پور میں بہترین اداکاری کا مظاہرہ کرنے پر پنکج ترپاٹھی کو بھارت سمیت دنیا بھر میں بےحد مقبولیت حاصل ہوئی۔

The post گھر میں ٹی وی تک نہیں تھا، بچپن میں کبھی پیسے نہیں دیکھے، پنکج ترپاٹھی کا انکشاف appeared first on .

Source link

LEAVE A REPLY

Please enter your comment!
Please enter your name here

close